ألأشياء الي لازم أسويها يومياً ونقاط كثيرة مفيدة .

السلام عليكم ورحمة الله وبركاته 

كيفكم مع الأجازه ؟ مستمرين بالرياضه ؟ 

بما أني فتره مانزلت بوست جديد قلت أسوي زي التعويض وأنزل بوست أجمع فيه أفكار كثيره 

يعني كم نقطه أتكلم عنها يعني تفيدني وتفيدكم بحياتكم اليومية كثير ولو طبقتوا بعضها بتصيرون أوكيه /حركة الأبهام/

ف عشان كذا جيبوا لكم عصير طازج وأقعدوا ورّوقوا معاي وأقروا بشويش عشان تدخل المعلومات وماتنسونها .

يلا بسم الله .

قبل ما أبدأ لازم أكتب لكم وش راح أتكلم عنه اليوم عشان تاخذون فكره :

بتكلم عن  

• وش الاشياء اللي لازم أسويها كل يوم ؟ أو وش المفروض أسويها ؟ 

• فوائد الموية ؟ أو أهمية الموية ؟ 

• أبي اسوي رجيم بس فيه أنواع رجيم كثيره ومو عارفة وش الصحي بينهم ، كيف أعرف ؟ وأيش هي الوجبة المفتوحه ووش سالفتها ذي ؟ 

• فوائد النوم المبكر أو النوم المنتظم .

خلاص خلصنا يلا نبدأ .

• وش ألأشياء الي لازم أسويها كل يوم ؟ أو المفروض أسويها ؟ 

طبعاً فيه أشياء كثيره لازم نسويها يومياً وأكثرنا غافلين عنها خصوصاً الحين صيف وحر 

وجسمنا يحتاج سوائل كثير أكثر من الأكل ، والحركه وكثيير راح أكتب قائمة بسيطة مفروض نسويها كل يوم وبشرح كل نقطه لو فيها شرح أو تتطلب شرح.

• شرب الماء بكثرة 

ليه أشرب موية كثير ؟ أولاً مثل ماقلت قبل أحنا حالياً بصيف وجسمنا يحتاج سوائل فلازم ع الأقل 8 كاسات موية ، لاتقولون صعبه يمديكم تسوونها ، مثلاً أول ماتقومون من النوم أشربوا كاستين مويه وقبل ماتنامون برضوا كاستين موية خصوصاً أول ماتقومون وقبا ماتنامون مفيد كثير ، ليه ؟ لأنه يتجنب السكته القلبيه أو النوبات القلبيه .

طيب ليه أول ما أقوم اشرب موية ؟ لأن يساعد على تنشيط الدورة الدموية عندك وخصوصاً لو كانت باردة شوي تساعد بعملية الأيض أو الحرق .

• الحركة 

كثير ناس يحسون بالخمول الزايد والكسل والعجز ، ليش ؟ لأن مافيه حركه بيومكم ، يعني ع الأقل تحركوا نص ساعه باليوم سووا رياضه خفيفه مو شرط قوية عشان تحسون أنكم سويتوا رياضه لا خفيفه تخليكم نشيطين باليوم ، لاتقعدون 3 ساعات او ساعتين متواصله بدون حركه ، الحركه بركة .

• كثر من الفواكه وبعد عن السكريات والأشياء هذي

يعني لو تبغى تحافط على جسمك لازم تحط لك قائمة بسيطة تمشي عليها وماتحرم نفسك من شيء ، مثلاً مو كل يوم كيك وكل يوم حلى وكل يوم تشوكلت لا ! حاول تخلي الفواكه سناكك والخضراوات بعد ، خنقول مثلاً أنك ماتسعى أنك تكون صحي بشكل تام بس تبغى تحافظ ع جسمك قد ماتقدر خصوصاً بهالجتمع مافيه توعية كبيره عندنا ، حاول تاكل مره بالاسبوع شيء مقلي واذا تقدر بعّد عنها نهائياً ، وكّثر من الفواكه والخضراوات وخلها سناكك المفضل *بسوي تدوينة عن الوجبات الخفيفه 2* ,

• حافظ على وجباتك الثلاث .

هذي يبي لها تدوينة والله ، بس بحاول أختصر وأجيب المفيد .

أولاً الي يبغون ينحفون يتجنبون الوجبات الرئيسيه ع أساس هي اللي تسمن لا قايز الوجبات الرئيسيه أهم شيء بيومك فطورك وغداك وعشاك أهم شيء لازم تحافظين عليها ، مو شرط تكون دسمة أنتِ خليها شيء خفيف ومفيد بنفس الوقت ، وحاولي تاكلين ببطئ عشان تشبعين .

• فوائد الموية أو أهميتها أيش هي ؟ 

فوائد الموية واهميتها كثييره بحاول أجيب لكم من كل شيء من البشره والجسم ..ألخ

فوائد شرب الماء ع الريق :

شرب الماء على الريق له فوائد كبيره ويساهم بعلاج الكثير من الأمراض مثل الصداع والأرهاق وأمراض القلب والسلّ وأمراض الكلى والجهاز البولي .

فوائد الماء للجسم والبشره :

- يعتبر الماء منشط قوي للدورة الدموية 

- الماء يعتبر منظف داخلي للجسم /كيف؟:ينظف السموم والفضلات الي ماتحتاجه الجسم.

-ينظم درجة حرارة الجسم .

-يعوض الماء مايفقده الجسم من سوائل التي تخرج من البول والعرق والرطوبة ..ألخ .

-ينشط وينظف الكلى .

-ينشط الجهاز الهضمي وعملية الأخراج.

-يجدد حيوية خلايا الجسم .

- يعطي نضاره للبشره ويرطبها .

• أبي اسوي رجيم بس فيه أنواع رجيم كثيره ومو عارفة وش الصحي بينهم ، كيف أعرف ؟ وأيش هي الوجبة المفتوحه ووش سالفتها ذي ؟ 

فيه رجيمات كثيره غير صحيه زي رجيم الكورن فليكس ورجيم الأندومي ومدري أيش ومنها تعرفين أنها مو صحّيه وأنها طريقة فاشله عشان تنحفين ولو نحفتي بيطلع شكلك ووجهك غير صحي وشين جداً ! ، يعني وش الله حادني عشان أسوي هالرجيمات السخيفه والي تدّمر صحتي قبل ماتدمر جسمي ومظهره ؟ ، ولو نحفتي بيبقى دهون بأماكن السمنة عندك يعني ما أستفدنا شيء حرمتي نفسك من أشياء كثيره بدون فايدة ، روحي عند أخصائية تغذية تدفعين ع شيء يفيدك ويفيد صحتك ولمستقبلك بعدين 

وماننسى الرياضه راح ترتب جسمك وتنسقه وتشده لك .

بالنسبة للوجبة المفتوحه أختاري لك يوم بالأسبوع وحطي فيها وجبه مفتوحه سواء غداء أو عشاء 

وكلي الي فيها الي تبغين ولا طبعاً ماراح يأثر عليك وع رجيمك ، الهدف منه أنك تعززين لنفسك وماتملين وتغير لنفسك وتزودين سعراتك شويه عشان جسمك ، ومن بكرا وازني اكلك يعني اذا كثرتي مو مشكله مو تقولين لا خربتها خلاص خرب رجيمي لاماصار شي ، من بكرا زودي رياضتك شوي وقللي من أكلك وبعدين أمشي عادي ولا صار شيء حمدالله .

• فوائد النوم المبكر أو النوم المنتظم .

النوم المبكر له فوائد كثيره وخصوصاً لو كانت منتظم ، يعني الشخص العادي البالغ لازم ينام تقريباً من 6-9 ساعات باليوم 

والأطفال الصغار أكثر يعني كلما كبرنا كلما قلّ نومنا بس أخر شيء 9-6 *قلت لكم* وليش أنام كذا ؟ 

عشان تحافظين ع جسمك ويساعد بنزول وزنك وينظم شهيّتك .

ومن فوائده بعد :

-النوم يساعد على تقليل ظهور أعراض كبر السن والخلايا السرطانيه يعني يخلي مظهرك شبابي أكثر 

-يرتفع هرمون النمو في الجسم الى أعلى مستوياته عند النوم

- النوم يعطيك الطاقه لليوم الثاني .

- هام جداً للجهاز العصبي ويساعد على تنشيط الذاكر.

وبكذا أكون خلصت البوست ، يارب أكون أفدتكم ولو بشيء بسيط وأن شاءالله أعجبكم وأي أقتراحات أو أنتقاد أو ملاحظه أو مدح لول هنا وأي سؤال بعد هنا . ومتشكرين كثير لأنكم تحمسوني أكتب ♥